Daej Daxboh

Daej Daxboh 悼父泣笔

2008 nienz 8 nyied 30 hauh， daxboh gou youq Nanzningz gvaqseiq。

　　 Boh gou gvaqseiq seiz yaek rim 80 bi。 Ciuq vahlaux gangj， vunz laux baenz neix， gijmaz haeux cungj gwn gvaq， gijmaz giuz cungj byaij gvaq ， gvaq bae hix laep da ndaej lo。 Hoeng， dawz vah neix daeuj gangj boh vunz deng， danghnaeuz dwg boh swhgeij， bouxlawz mbouj siengj bohmeh souhyienz daengz bak bi？ Caiqgangj， boh gou youh dwg soqlaiz ndangcangq， de cungj mbouj yungh dou ciuqgoq， dauqfanj dwg de bang ndaw ranz guh ndaej haujlai hong。 Lijmiz， de cib lai bi？ cungj mbouj bae gvaq yihyen。 De gvaqseiq geij ngoenz gonq， aenvih mizdi gyaeujngunh， gou daiq de bae aen cinjsoj gyawj ranz haenx yawjbingh， bouxcanghyw lij naeuz：“Boh mwngz ndangdaej ndei hw， de souh daengz bak bi cungj ndaej。”

　　 Boh gou baenz seiq vunz sinhoj， mwh de ngamq ndaej 40 bi， meh gou couh baenzbingh gvaqseiq lo。 Vih ciengx hung dou sam beixnuengx， daxboh daengz gvaqseiq geijcib bi cungj dwg ndangdog。 Doeklaeng， dou sam beixnuengx cungj youq ndawsingz gunghcoz， daxboh duiyouh le daj lajmbanj daengz Nanzningz daeuj caeuq gou youq。

　　 Daxboh ciuhvunz daihbouhfaenh seizgan youq lajmbanj dang lauxsae， gwn haemz gwn hoj geijcib bi， gou laihnaeuz ciep daxboh haeuj cwngzsi le， hawj de ndaej yiengjfuk， mboujliuh， daxboh youq ndaw cwngzsi gvaq ndaej mbouj ndei。 Ndaw cwngzsi dauqcawq laeuz sang vunz lai， hoeng daxboh mbouj sugnaj saek boux， mboujdan youq baihrog ra boux vunzsug gangjgoj cungj mboujmiz， lienz byaijloh cungj lau ci cung gvaqdaeuj。 Daengz lwg gou okseiq seiz， daxboh gou angq lo， de baenzngoenz yawj lwglan riunyumnyum。 Hoeng， cungj angqyangz neix ngamq ndaej geij bi， daeglan hung le aeu bae hwnj hag， goenglaux youh gag boux dog youq ranz lo。 Lwglan cuengqhag ma ranz， goeng siengj caeuq lan gangj di vah， hoeng lan youh aeu ganjgip？ guh cozyez， cijmiz hwnj daiz gwn ngaiz seiz， song goeng lan cij miz di seizgan gangjvah。 Gou swhgeij aenvih gingciengz bungz daengz gij saeh mbouj swnhleih， ma daengz ranz daxboh raen gou naj ndaem naj ndaet， siengj caeuq gou gangj vah hix mbouj gamj ok sing lo。 Daxboh mboujmiz vunz gangjvah， de couh yawj densi gvaq ngoenz gvaq haemh， bungz daengz ngoenzlawz？ densi？ miz Cunghgoz Nijbaiz dwkgiuz， de ngoenzhaenx couh sim’angq。 Daengz seizneix daxboh gvaqseiq le gou cij rox： Daxboh aenvih baenzngoenz mboujmiz vunz gangj vah， cijmiz yawj Cunghgoz Nijbaiz gaijmbwq。

　　 Daxboh vihmaz sawqmwh gvaqseiq， daengz seizneix siengj hwnjdaeuj gou lij ienqhoij yaek dai。 Daxboh miz gauhhezyaz， gvaqseiq gonq geij ngoenz de naeuz mbouj cwxcaih， gou couh daiq de bae liz ranz mbouj gyae aen segih mwnzcinj yawj bingh。 Mbouj siengj daengz， gou baenzneix guh， daengzlaeng haih dai daxboh gou。 Aen segih mwnzcinj yw di gyaeuj ngunh ganjmau lij ndaej， yw binghnaek couh ca lo。 Daxboh gou seizhaenx dwg binghnaek lo， de youq mwnzcinj diuqcim geij ngoenz le， bingh lumj？ ndei di lo， gizsaed， seizhaenx bingh engq naek engq yungyiemj lo。 Haemh haenx， couh dwg youq gou mbouj louzsim seiz ok daihsaeh lo。 Haemh haenx， daegnuengx ma ranz yawj daxboh， de lij daengq naeuz：“Daxboh， mwngz miz maz mbouj cwxcaih aeu caeuq go gou gangj hw！” Haemhhaenx， ndaw densi youh miz Cunghgoz Nijbaiz dwkgiuz， daxboh yawj densi， yawj gij yiengh de gig angq。 Daengz lajbyonghhwnz， daxboh fatbingh lo， de？ ninz youq gwnz mbonq diemheiq cungj nanz， aeu naengh hwnjdaeuj cij diem ndaej heiq。 Seizneix， bingh de gaenq gig yungyiemj lo， hoeng daxboh laihnaeuz mbouj youqgaenj， caiqne de youh lau heuh gou le mazfanz gou， yienghneix de couh nyengh dingj daengz ranzrongh cij heuh gou。

　　 Gou hwnq mbonq le， raen daxboh naj hau hanh lae， diemheiq dwgrengz。 Seizneix， danghnaeuz gou sikhaek daj dienhvah hawj 120 couh ndei lo。 Hoeng， aenvih daxboh gangj gawq vah he， gou guh loek lo： Youh daiq daxboh bae aen mwnzcinj haenx。 Daxboh seizhaenx dwg gangj gawq vah neix： “Gwn di doxgaiq cij bae yihyen ha？” Gizsaed， seizneix daxboh heiq cungj yaek goenq， de lij gwn ndaej gijmaz doxgaiq？ De dwg siengj caj gou gwn le cij bae。 Gou seizhaenx youh huk dai， laihnaeuz daxboh lij gwn ndaej doxgaiq， bingh mbouj naek geijlai……

　　 Daxboh youq aen cinjsoj haenx dajcim seiz， gij yiengh de lumj yaek goenqcaw nei， canghyw naeuz mbouj ndaej lo， aeu soengq bae yihyen hung gouq mingh cij ndaej。 Yienghneix， daxboh youh deng soengq bae aen yihyen hung he。 Youq aen yihyen haenx ， daxboh muenh baenz caet ngoenz， canghyw ciengjgouq de caet ngoenz， doeklaeng ciuqyiengh gouq mbouj ndaej。 Haemhhaenx， canghyw heuh dou sam beixnuengx haeuj aen？ fuengz cienmonz yw boux binghnaek haenx bae， dou yawj raen daxboh gwnz ndang dauqcawq cap miz cim caeuq guenj， seizneix， gangj gijmaz de cungj mbouj nyi mbouj rox lo。 Sam beixnuengx dou cungj mbouj saenq， geij ngoenz gonq daxboh lij cingsaenz dangqmaz， seizneix gangj bae couh bae lo……

　　 Siengsim daengz siengj dai bae， youh dingqnyi canghyw gangj binghyaen le， ndawsim engq ienqhoij daengz dai： Daxboh baenz gij bingh neix heuhguh sinhgihgwngjswz， couh dwg simdaeuz saek lwed doeng mbouj ndaej。 Canghyw naeuz， cungj bingh neix haujlai bouxlaux cungj miz， danghnaeuz fatbingh seiz youq？ 6 aen cungdaeuz ndawde soengq daengz yihyen hung， youq yihyen hung guh aen soujsuz heuh guh “cihgya” he， cungj soujsuz neix mbouj suenq hung， hoeng doiq cungj bingh neix gig miz yungh， daxboh gou danghnaeuz fatbingh caengz gvaq 6 aen cungdaeuz ndaej guh cungj soujsuz neix， de caiq souh 5 bi cungj ndaej……Hoeng，haemh haenx daxboh fatbingh seiz mbouj heuh gou， mbwn rongh le gou youh mbouj daj dienhvah hawj 120， youh daiq daxboh bae aen cinjsoj haenx， nguh bae geijlai seizgan， haih？ daxboh couh yienghneix bae lo……

　　 Yienghneix loeklak， daxboh couh bae lo， beixnuengx dou siengsim yaek dai， daej cungj mboujmiz raemxda。 Youq gizneix， gou siengj lwnh gyoengq bouxdoeg： Bouxlaux youqseiq seizhaenx， raeuz bouxboux cungj gangj swhgeij hong nyaengq mbouj miz seizgan， cungj mbouj guenj bouxlaux geijlai， miz seiz lienz caeuq bouxlaux gangjvah cungj gik， hoeng， ngoenzlawz bouxlaux sikhaek gvaqseiq bae， couh ienqhoij mbouj gib lo。 Lijmiz， doiq cungj bouxlaux bingzseiz ndangcangq haenx， vunzraeuz hix mbouj ndaej cosim， aenvih cungj bouxlaux neix bingzseiz mbouj bingh， bingh hwnjdaeuj couh aeu mingh。